بو سئوگی دن سن قورخورسان عیبی یوخ

من سئورم ایکیمیزین یئرینه

بو عشق اوچون بیر گون دارا چکسه لر

من گئدرم ایکیمیزین یئرینه

مین عذاب دیر سن سیز کئچن هر گونوم

اونوتموشام یاخشی یامان فرقینی

بو سئوگینین داغ اریدن دردینی

من چکرم ایکیمیزین یئرینه

گول دئییرم گول قلبینه دییرم

من سنین چون تانری یازان شعیرم

دوداخلاری ایینجیمه سین دئییرم

من اوپه رم ایکیمیزین یئرینه

طالعیمده سن آچیلان گولوم سن

سوزوب قارا گوزلرینی گولومسه

بو سئوگی نین سونو اگر اولومسه

من اوله رم ایکیمیزین یئرینه

رحمتلیک نصرت کسمنلی

بو شعر رحمتلیک "نصرت کسمنلی" دن دیر، آنجاق دوسلار مندن "دالغا خاتین اوغلو" دان " من اولرم ایکیمیزین یئرینه" شعرین ایسته میشدیلر کی من بیلدییمه گوره بو همان شعر اولاجاق.

گینه ده سراغلاشارام اگر دالغا خاتین اوغلودان دا بو آددا بیر شعر تاپسام حتمن قویارام.

ساغ اولون 

حسرتی بوراخیب

سن سیزلیی آغلار قویوب

سنلی آنلار یاشاماق اوچون

یوخویا دالیرام

بيزيم قديم محلله ميزده بولود عمي آديندا بير قونشوموز وار ايدي، آلاه رحمت ائله سن ياخجي كيشي ايدي. يلميرم رحمتليك بولود عمي نيه بيردن ياديما توشدو؟ آنجاق آلاه بو گئدنلره رحمت ائله سين نه قدر آدامين يانينداديلار ، آدام بيلمير كيمديلر آما نئجه كي آراميزدان گئتديلر هله تزه باشا دوشوروك كي نمنه ني الدن وئرميشيك. نه بيليم بلكه بو خاصيتيميزه گوره بيزه ده اؤلو پرست دئييرلر.

هر حالدا رحمتلييك بولود عمي دن دانيشيرديم :

ياخجي ياديمدا، بير گون كوچه ده اوشاخلارينان اوينويوردوق و بولود عمي ده هر گونكو ساياق توكانين قاباغيندا اوتوروب و بيزلره باخيب و هردن ده شوخلوق ائلييب و مزه لي سوزلردن دانيشاردي. (البته ايندي بيليرم او سوزلر نه قدر مزه لي ايمش ، يازيق كي او زامان بو سوزلرين مزه سيني دوشونمه ديك)

هر حالدا ايجازه وئرين ياديمنان چيخماميش خاطيره مي تعريفلييم يوخسا اؤزومو تانييرام، ايكي ديقه ده كئچسه سوزون باشين ايتيره جه يم.

ياخجي ياديمدا دئييل كي قضيه نمنه ايدي آنجاق سيزده بو قدر بيلين كي اوشاخلارين بيري اله سالينميش دي و باشقا اوشاقلار اونا گولوردولر، يازيغين اوستونده بتر زوم اولونموشدو و اودا ال آياغين ايتيريب اؤزوندن ادا چيخاتماغا باشلاميشدي كي نه وار نه وار! سيزين سؤزلريز منه اونملي دئييل!!

بو آغير اتمسفرين تاثيري آلتدا، اوغلان كاپشنين ايينييندن چيخارديب و ترسينه گئيميشدي، بو صحنه ني رحمتليك بولود  عمي گوروب دئدي : آي بالا بئله کی چوخ بتر گولونج اولدون!

بو سؤز منيم بئينيمده قالدي آخي او گونه كيمي من هله گولونج سؤزونون ائشيتمه ميشديم كي او آنلامدا ياني مضحك و مسخره آنلاميندا ايستيفاده اولونسون آما هردن آنامدان گولوش سؤزونو ائشيدرديم كي هر ايكي آنلامدا دا ايستيفاده ائلييردي هم گولوش (تبسم) هم ده گولونج (مسخره).

ايندي ايسه گولوش يوخسا گولونج؟

منجه گولوش داها ياخجي دي 

گولوش هر زامان دوداقلاریزین بزه یی اولسون

یئنه بو شهرده اوز اوزه گلدیك

نیئله یك آیریجا شهریمیز یوخ

بلكه ده بیز خوشبخت اولا بیلردیك

بلكه ده خوشبختیك خبریمیز یوخ

آرادان نه قدر ایل كئچیب گورن

تانیا بیلمه دیم سنی باغیشلا

من ائله بیلیردیم سن سیز اولرم

من سن سیز اولمه دیم منی باغیشلا

اولمه دیم دئییرم نه بیلیم آخی

بلكه ده من سنسیز اولموشم هله

قبیرسیز كفن سیز اولموشم ائله

بلكه بیز اوندا آیریلماسایدیق

نه من ایندی كی یم نه سن ایندی كی

آیریلدیق شیطانی گولدوردوك اوندا

بو ایلین بو آیین بو گونونده كی

ائله بو كوچه نین بو تینینده كی

منی ده سنی ده اولدوردوك اوندا

ساغیمیز سولوموز آداملا دولدو

قول قولا كیشیلر قادینلا كئچیر

اوزوندن خبرسیز عومرونده مین یول

اوزونو اولدورن آداملار كئچیر

كئچیر اوز قانینا باتان اداملار

بیر ده كی قان هانی؟

قان آخی یوخدو

هامی گوناهكاردی دونیادا آمما

دونیادا هئچ كسین گوناهی یوخدو

بیز سیز یازیلمیشدی بو طالع بو بخت

ساپاندان آتیلان بیر جوت داش ایدیك

بلكه ده دونیادا اون اون بئش ایل یوخ

مین ایل بوندان قاباق آیریلمیشق بیز

حالال یولوموز دئییشیب نه سه

چاشمیشیق بیر اوزگه یولدان گئتمیشیك

بلكه مین ایل قاباق سهو دوشوب نه سه

مین ایللیك بیر سهوه قوربان گئتمیشیك

دئییشیب یئرینی بلكه قیش باهار

قاریشیب دونیانین شهری كندی

بلكه اوز بطنینده اوگئی آنالار

اوگئی بالالار گزدیریر ایندی

عومروم باشدان باشا یالان دی بلكه

طالعیم باشقایمیش دوغوردان ائله

او یولدان اوتن قیز آنامدی بلكه

بلكه ده اوغلومدو بو اوغلان ائله

بو یالان عومرومده گورن سن نه سن؟

بلكه هئچ سئوگیلیم دئییل سن منیم

آنامسان باجیمسان ننه م سن نه سن؟

بیرجه الاه بیلیر نه ییم سن منیم

بیزی كیم آلدادار بو آیریلیخدان

چاتماز دادیمیزا نه یول نه كورپو

اولو سن دیری سن هر نه سن دایان

دایان هئچ اولماسا الیندن اوپوم

دئییرسن اولویم اولونو اوپمه

الیمین ایچینده سویویور الین

دئییرسن سن الاه الیمی اوپمه

الیمدن دئییرسن قان ایی گلیر

اوغلان ايمام خيابانين دا مخابرات قاباغيندا تاكسي دان توشوب، خيابانين اوتاييندا، معليم پاركينا، گوروش قرارينا گئتمك ايستييردي كي تاكسي دان دوشركن قيزا گوزو ساتاشدي. سلاملاشيب بيرليكده يولا دوشودولر. هميشه كي ساياق دا دانيشيغين سونو قيز دئديي كيمي، "آموزش زبان تركي" يه يونله نير:

"آي بالا نئچه دفه دئميشم تركي يوخ توركي ، هله ياخجي سني توركجه دئمه يه مجبور ائلميرم" دييه ايكي سي ده گولورلر...

بير نئچه گون كئچديكدن سونرا:

-          الو

-          سلام ، نئجه سن؟

-          ساغ اول سن نئجه سن؟

-          ...

-          ياخجي ياديما توشدو كامپيوتريم ياخجي ايشله مير اونا بير باخ دا

-          كامپيوتر يوخ ، بيلگي سايار

-          ياخجي سن دئين اولسون، بيلگي سايار

قيز كونولسوزجه سينه بير داها تيكرار دئيير: بيلگي سايار ، بيلگي سايار

بير آي دان سونرا:

-          الو

-          سلام

-          سلام

-          دوستومون حنابنداني دي، بعد از ظهر گل داليمجا باهم گئداخ

-          يولداشيوين نمنه سي دي؟

-          اه بابا ياخجي دا، سن ده لاپ شورون چيخاتميسان، سيزين بو كلاس آموزشيز قوتولمادي؟

يازيق اوغلان گوشي ني قويوب و اوز يالنيزليغينا گئري دونور .

آهو کیمی بیر تازه شیکاریم گئدیر الدن

صیاد اولالی سالدی منی صید کمنده

تاپدیم اوزومو اوندا کی واریم گئدیر الدن

تاپشیرسا تئلین بیرده اگر باد صبایه

سوکدوکجه صبا زولفو قراریم گئدیر الدن

او یاندیریجی نازلی باخیشلا منه باخما

باخدیقجا منه شعر و شعاریم گئدیر الدن

آز ناز ائیله چوخدا او قارا زولفه گوونمه

او زولفیوه اوخشار شب تاریم گئدیر الدن

قالدیم بئله حئیران او گوزل قامتی گورجک

ایندی یانیرام سروی باهاریم گئدیر الدن

داغلار مارالی داغدا گزه هر کسه خوشدور

قویما بو سهندین سسی اوجالسین کی ویقاریم گئدیر الدن

گل بیر داها خاطیرلایاق کئچمیشیمیزی

گونلرین اوتمه سینی

زامانین تلسمه سینی

و آیدین بیر گله جک گوزله دییمیزی

ایندی نه یازیق!

گله جک اولوبدو؟

یوخسا یوخ؟

داها گونلریمیز اوتمه یه قرار وئرمکده دیلر

اونلارلا بیرلیکده بیر سونسوزا دوغرو گئتمک زورونداییق

داها ساعتلر سانیه لردن توولو گئدیرلر

هادی! سن ده تْلْس!

آرتیق زامانین گئمه سینی سیئر ائتمه یه ماجال یوخ

دورمامالییق

دورارساق گئری قالمالییق

گئتمه لییک

بیر اوزون یوللار آردیندا

آیدین بیر گله جک بیزیم اولمالیدیر

آرتیق کئچمیشی خاطیرلاماق دئییل

یالنیز اونو قایتارمالییق

او آیدین گله جک بیزیم کئچمیشیمیزدیر

یئترلی قدر اونو سیئر ائدیب خاطیرلامیشیق

ایندی ایسه قایتارمالییق

قاییت کئچمیشیم!

تئز گل گله جه ییم!

وطن وار

هارداسا بو دمده

دريادا وطن وار

وارديرسا كومك سيز

فريادا چاتان وار